مشكله ارجو المساعدة لحلها

في البداية احب اقول اني دايما اشوف الفرص قدامي وماعرفش اعمل حاجة لحد ما تيجي وحده لعبية وتخطف الفرصة دي.... أما دلوقتي خلاااص ماقدرش اشوف كده واسكت خصوصا اني المره دي بحب بس مش قادره اقول....

القصة من البدايه:

انا بنت ابويا واخويا الوحيد ماتوا الله يرحمهم.. كان في واحد دكتور متجوز حبني وانا حبيته.. بس بعدما لقيت انه بيحط اعزار عشان ما يتجوزنيش عشان بيخاف من مراته وبيخاف على عياله..وانا محبش اخرب بيت حد.. وبعدما حسيت انه بقى سخيف معايا بردت من ناحيته خصوصا انه دايما يفتح معايا موضوع الجواز العرفي.. واحد من صحابه "على حد علمي" عارف انه كان بينا حب.. المهم.. بعدها كلمته وقلتله انا عاوزه علاقتنا تكون اصحاب واصدقاء.. مش عاوزه اخسرك لان مالياش غيرك وانت عزيز عليا.. قال لي حاضر.. ايام ما كنا حبايب شفت مره معاه واحد من صحابه سلم عليا وسلمت عليه.. قام "حبيبي سابقا" باسني على خدي قدامه!!!!! بس ما قلتش حاجه.. ومع الوقت حسيت انه تعمد يعملها قدام صاحبه ده بالزات.. المهم..

ارتحت كتير بعد ما بقينا صحاب.. كنت ازوره بالعياده بتاعته هوه واصحابه واقعد معاهم شويه في غرفة استراحتهم.. وعرفت ان صاحبه معجب بيا.. بس كمان بقينا اصحاب.. بس مش قد صاحبي الاولاني.. بس حسيته يفرح قوي لما يشوفني.. انا كمان شوي شوي حسيت اني بحبه ومعجبه فيه.. خصوصا انه محترم جدا وكمان ذكي جدا.. ومره من المرات قعد معايا يدرسني لامتحان البيولوجي.. كتر خيره لأن صاحبي الأولاني قال لي حيدرسني وبعدين قال لي بشرط انه يتجوزني عرفي "( طبعا قلت لأ.. فكلمت صاحبه وطلبت منه يدرسني وافق وفعلا درسني.. ولما خلصنا قلت له انا اسفه اني اخدت من وقتك وعطلتك انا كنت طلبت من صاحبك بس عمل حركه مش كويسه.. قالي ايه هيه؟ ما قلتلوش.. قلت له مش هاقدر اقول "هوه كمان صاحبه وانا مش عاوزه اعمل فضايح وممكن انه ما يصدقنيش كمان) المهم..

يومها وقبل ما يدرسني عرفت ان صاحبي الاولاني هوه ومراته قاعدين يخططوا على اللي بحبه عشان يجوزوه بنتهم مع انها صغيره خاااالص.. بس همه حاطين عينهم عليه عشان ابن ناس..

المهم.. قبل شهر قررت اعمل لهم حاجه حلوه في العياده للدكاتره كلهم في الفالنتاين (بعد يومين) واشتريت حاجات كتيره وطلبت كيكه وجهزت كل حاجه.. وكمان اشتريت تحفه مكتوب فيها حاجه بين الأصدقاء تعمدت اديها صاحبي الأولاني عشان يفتكر ان احنا اصحاب وكمان عشان اللي بحبه يعرف ان مافيش علاقة حب بيني وبين صاحبي الأولاني..

قبل يومين كنت عندهم في العياده.. دخلوا بنتين خريجين طب نفسهم.. عرفت ان الدكاتره كانوا بيدرسولهم.. وحده منهم كانت عامله لهم بسكويت قاموا تجننوا عليه وعليها كلهم.. وقعدت تمدح بنفسها بطريقه غير مباشره وتتكلم عن خواتها وابوها واهلها.. وعرفت كمان انهم حايشغلوها معاهم بالعياده.. واللي كمان كان واضح انها كانت حاطه عينها على اللي بحبه عشان كده مضبطه كل الدكاتره عشان يمدحوها قدامه.. وانا قاعده وساكته.. ما بعرفش اعمل الحركات دي.. وفوق كل ده صدقوها وانا اللي صاحبي الاولاني يحرجني دايما قدامهم :"( وعرفت كمان انها من قبل عملالهم كيكه بايديها ليهم

المهم.. انا دلوقتي المفروض يوم الفالنتاين اللي مخططاله من زمان اعمله يوم السبت.. بس بعد ما شفت البنت والبسكويت اللي عاملاه ليهم ترددت اعملهم الفالانتاين.. بخاف لا يقولوا اني غرت منها واني بقلدها واني بحاول اضبط.. مع ان والله كنت مخططه من زمان اعملهم مفاجأه وكمان كان في اكتر من فرصه اقدر بيها اضبط اللي بحبه بس ماعرفش ولا بحب اعمل زيها وزي البنات اللعابيين..

اعمل ايه؟؟ اسيبها كمان تاخد اللي بحبه مني هيه وغيرها ولا اعمل اي.. انا تعبت.. وفعلا محتاجاله.. مش عاوزه منه حاجه الحمدلله انا كمان بنت ناس وعيني مليانه.. انا بس عاوزاه هوه وعاوزاه يعوضني عن ابويا واخويا.. اعمل ايه انا دلوقتي؟